Tərkibi:tart və pay xəmiri - ikiqat
albalı (təzə və ya dondurulmuş) - 1 kq
albalının şirəsi + su - 1 stəkan
şəkər tozu - 180 q (1 stəkan yaxud zövgə görə)
darçın - 1 ç. q. (zövgə görə)
qarğıdalı nişastası - 2 x. q.
limon şirəsi - 1 ç. q.
üzərinə çəkmək üçün 1 yumurta
Hazırlanması:Əgər albalı təzədirsə, onun tumlarını sancaq və ya xüsusi cihaz ilə çıxardın. Üzərinə bir-iki qaşıq şəkər tozu tökün və bir qədər şirə əmələ gələnə qədər gözləyin. Əgər albalı dondurulmuşdursa, onu sadəcə əridin.
Həmin şirəyə o qədər su əlavə edin ki, axırda düz bir stəkan maye alınsın. Bir az maye ayırıb orada nişantasını həll edin. Sonra qalan mayeni, şəkər tozunu və darçını balaca qazanda qarışdırıb orta odda bişirin.
Kütlə qaynayanda albalını əlavə edin. Albalı yumşalana qədər bişirin.
Limon şirəsi əlavə edin və kütləni soyuyana kimi kənara qoyun.
İndi isə bu reseptə əsasən 400 q undan xəmir hazırlayın. 30 dəqiqə ərzində soyuducuda qalandan sonra xəmiri 2 qeyri-bərabər hissələrə bölün.
Xəmirin daha böyük hissəsinin üzərinə un səpib onu dairəvi şəkildə yayın. Diametri formadan daha böyük, qalınlığı isə təxminən 3-4 mm olmalıdır. Yayılmış xəmiri qalın oxlova dolandırıb formaya köçürdün və onun içində xəmiri açın. Xəmiri formaya yayın və üzəri albalı kütləsi ilə doldurun.
İndi piroqun üst qatını edəcəyik. Qalan xəmiri dairəvi şəkildə formanın diametrinə qədər yayın. Ya fiquralar kəsib üzərinə qoyun, ya da mənim kimi 1,5 sm zolaqlar kəsib hörgü edin. Üst xəmiri yaxşıca alt xəmirə yapışdırın. Artıq kənarları kəsin. Yumurtanı bir az çalıb xəmirin üzərinə çəkin.
160-170 dərəcəyə isidilmiş sobada qızılı rəngə qədər bişirin. Sobanın alt gözünə list qoyun, çünki piroqun içliyi tökülə bilər. Bişmiş piroqu tamamilə soyudun, yoxsa içi duru olar.
Nuş olsun!
Etiketlər: qədər, xəmiri, üzərinə, albalı, bişirin, yayın, qoyun, əlavə, şirəsi, şəkər, stəkan, dairəvi, formaya, kəsib, şəkildə, zövgə, piroqun, böyük, köçürdün, edəcəyik