Duzlu çöplər, popkorn, M&M’s, marşmellou - uşaqların istənilən xörəyi uğruna rədd edəcəkləri şirniyyat və çərəzlərdir. "Ziyandır" deyib çox zaman onları bu sadaladıqlarımızdan məhrum etsək də, ildə bir dəfə, öz bayramları zamanı qarışdırıb festival kimi rəngbərəng bir tortla sevindirmək olar. Ad günləri üçün də yarayar. Sevinəcəklərinə əmin olun.
Tərkibi:2 paket popkorn
2 st. M&M’s konfetləri
1,5 st. duzlu çöplər
450 q marşmellou
120 q kərə yağı
Hazırlanması:Ortası deşik olan formanı kərə yağı ilə yağlayın.
Hazır popkorn yoxsa, qarğıdalını mikrodalğalı sobada hazırlayıb bərk olan dənələri atın.
Duzlu çöpləri xırdalayın, çox kiçik olmasın. Popkorn, duzlu çöplər və M&M’s-i qarışdırın.
Bir qazançada kərə yağını əridin, əriyən kimi marşmellounu əlavə edib eynicinsli kütlə alınanadək qarışdırın.
Ocaqdan götürüb popkorn, M&M’s və duzlu çöplərin qarışığının üstünə tökün, qarışdırın.
Bu qarışığı hazırladığınız formaya töküb əlinizlə basdırın (formaya tam otursun). Üzərinə folqa çəkib otaq temperaturunda 1 saat saxlayın.
Bu tortu soyuducuda 1 sutkadan artıq saxlamayın.
Nuş olsun!